Assam cabinet-in UCC chungchangah thutlukna la siam lo

Chief minister Himanta Biswa Sarma kaihhruaiin Assam cabinet chuan Inrinni khan Assam-a hman tur, Uniform Civil Code (UCC) chungchang an sawiho a, thutlukna erawh siam a la ni lo thung.

Chief Minister Sarma chuan Uttarakhand sorkarin an state-a UCC hman tura ruahmanna a siam hnuah, UCC chu Assam-a hman ve a nih tur thu a lo sawi tawh a, Inrinnia cabinet meeting ṭhutkhawmah sawiho niin, thutlukna an la siam thei lo niin an tarlang.

Assam PHE minister, Jayanta Mallabaruah chuan,"Thil tam tak kan sawi a, thuruk vawng tura thutiam la tawh ka nih avangin cabinet-a kan sawi erawh ka tarlang thei lo. Thutlukna tawp siam a nih hnuah chauh thil kimchang chu kan la sawi ang" tiin a tarlang.

Hetih lai hian cabinet meeting-ah hian bill thar an pawm thung a, he bill-ah hian tihdam theihna thil reng reng khap a nih tur thu leh, Kristianin tihdamna an kalpui ṭhin pawh khap a nih tur thu tarlan a ni. "Inenkawlna hmingchhala tihdamna ang chi dawngte tana harsatna siam a nih loh nan, state cabinet chuan Assam healing (Prevention of evil practices) bill, 2024 chu a pass a, he dan hmang hian mi tu pawh tihdamna thil ang chi reng reng kalpui leh ti hriat a nih chuan pawisa chawi leh tan ina khung thlenga hrem theih an ni" tiin an tarlang.

Assam hian budget session nei mekin, February 28 thleng a awh ang. Session chhung hian bill 11 pharh hman tum a ni.