Manipur: Hmun ralṭia awm police-te hlawh tipung dawn

Manipur chief minister N. Biren Singh kaihhruaia state cabinet meeting chuan Manipur police commando leh state sorkar hnuaia venhim hna thawktu, hmun ralṭi leh him lo zual deuha awmte hlawh tihpunna tur an pawm.

Chief Minister Singh hian cabinet thutlukna hi hman nghal a nih tur thu X-ah post-in,"State cabinet chuan Manipur police commando huaisen tak tak leh venhim hna thawktu dang te, hmun him lo zuala awmte hlawh tihpunna tur chu a pawm," tiin a tarlang.

Cabinet thutluknaa tarlan a nih danin Manipur police commando-te hlawh hi Rs. 5,000-a tihpun tur a ni a, state hnuaia venhimna thawktu dang, hmun ralṭia awmte hlawh chu Rs. 3,000-a tihpun tur a ni. Cabinet-ah hian police department-in an thil thlen hrang hrang ngaihtuaha sawiho a ni bawk.

Village Defence Force (VDF) te pawimawhzia sawiin, cabinet chuan an service chu kum khat dang, April 1, 2024 aṭanga March 31, 2025 thleng pawhsei an remti bawk. Hun rei tak tualchhung buaina a thlen tawh avanga loneitute harsatna tawkte puihna turin, verified farmer-te tan Rs vbc 18.91 pekna tur an pawm bawk a, verified farmer-te hi Argiculture leh Home Department-ten uluk taka an zirchian hnuah an thlang a ni.