Dimapur-ah CAA duh lohna lantir dawn

Dimapur, Nagaland-a Supermarket-ah vawiin hian Citizenship (Amend­ment) Act (CAA) duh lohna lantirin nawrh huaihawt a ni dawn. 

Organising committee chuan thuchhuah an siamah, Dimapur-a CAA duh lohna an lantirna hi political party nena in­kaih­hnawihna nei lo a nih thu leh, boruak muanawm tak hnuaiah buatsaih a ni dawn tih an sawi. Zing dar 10 aṭangin nawrh huaihawt hi ṭan a ni dawn a, thusawi, skit leh on the spot painting te a awm tel dawn a ni. 

CAA hi ramchhung hmun hrang hranga dodal chhunzawm zel a la ni a, "Ram pumin a buaipui laiin Nagaland chu a lo ngawi reng thei bik lo a ni. Hei vang hian Naga mipuite pawh hmun hrang hranga he dan siam thar duh lotute an thlawpna lantir a, nawrh huaihawtnaa tel vek turin kan sawm a ni," tiin committee chuan a sawi. Nagaland-a tribal body leh civil society orga­nisation hrang hrang pawh­in CAA hi an thlawp loh thu an sawi tawh bawk. December 19,2019-a joint meeting an neihah CAA hian Nagaland huam tel lo mah se, ramchhung hmun dang leh ṭhenawm state-a he dan hi hman a nih chuan ILP leh Article 371A chuan Nagaland chu a venghim zo tak tak dawn lo tih an sawi. 

Lok Sabha leh Rajya Sabha-a Nagaland MP-ten CAA thlawp lama vote an thlak chu an dem thu sawiin, hun lo kal zelah CAA avanga Naga mipuite din­hmun a derthawng a nih chuan MP-te chu mawh­phurtu leh a bultumtu ah an ngai dawn tih an sawi bawk.