Tripura : Zirlai pawlin kawngpui leh rel kawngte dang

Tripura-a zirlai pawlte chuan Tripura Board of Secondary Education (TBSE) laka an lungawi lohna lantir nan, nimin khan national highway leh rel kawng ṭhenkhat an dang.

Zirlai pawlin TBSE laka an lungawi loh chhan an tarlanah, TBSE hian tribal zirlai, Kokborok ṭawng exam tura kalte, Roman hawrawpa an chhanna ziah an phal loh vang niin an sawi. TBSE hian higher secondary leh secondary exam chu March 1 aṭanga ṭan turin ruahmanna a siam a, tribal zirlai 5,000 zet exam tur hi an awm bawk a ni. Tribal zirlaite Roman hawrawpa ziaka Kokborak paper exam a phalsak loh hnu hian Tripura-a eptu party lian ber, Tipra Motha Party (TMP) hnuaia zirlai pawl, Tipra Indigenous Students Federation (TISF) chuan national highway-8 leh rel kawngte chu tiam chin awm loa dan an tum thu an sawi chhunzawm nghal a ni.

Lungawi lohna lantira kawng an dan hian Tripura Tribal Areas Autonomous District Council (TTAADC) huam chhung a nghawng ber a, Twipra Student’s Federation Vice President, John Debbarma chuan,"Kan nawrhna hian board exam-a Kokborok ṭawng, Roman hawrawpa chhan theih kan duhna a lantir a ni. TBSE president hnenah memorandum kan theh lut tawh a, sorkar hnen aṭang erawh chhanna kan la dawng lo. A hmangtu leh ram leilung fate'n an pawm loh hawrawp hmanga an ṭawng ziahtir hi zirlaite chanvo rahbehna a ni," tiin a sawi.

Kokborok hi Borok mipuite ṭawng a ni a, an chenna hmun avanga Tripuris tia hriatte an ni. Zirlaite hian Kokborak ṭawng exam chhanna hi Bengali ni loin Roman hawrawpa ziah an duh thu an sawi a, Roman hawrawpa Kokborok ziah chungchang hi Tripura assembly session-ah pawh tun hnai khan sawiho a lo ni tawh a ni.