Meitei pawlin SoO tihtawp an duh

Meitei Heritage Welfare Foundation chuan sorkar laipui hnenah tlanga inkhuar helpawlte nena inremna ziah, Suspension of Operations (SoO) chu sût turin an ngen.

January 17 khan Moreh-a T. Yangnom hmunah helpawl leh 5 Assam Rifles-te inkahna thlengin, he inkahna video hi tun hnai khan a darh a ni. He video darh hnu hian Meitei pawl chuan sorkar laipui hnenah SoO sut tur hian an ngen a, venhim hna thawktute'n helpawl thunun an tum dan chu a dik tawk lo niin an sawi. Meitei Heritage Welfare Foundation hian helpawlin venhim hna thawktute an vau leh an bei ngam chu India security force tihmingchhetu nia an ngaih thu an sawi a, video darha inbeihna pawh hi helpawlin central leh state sipai pariat an thah hunlaia thleng niin an sawi bawk. Helpawlin Assam rifles convoy an lo dan avanga inbeihna thleng chhunzawm ta nia a lan thu leh, convoy chu inbeihna thlenna hmun pana kal a nih thu te, SoO bawhchhiat a nihna lantirtu a nih thu leh Supreme Court thupek kalha Thangjing Hills-a sakhaw hmun thianghlim tihbawrhbanna a nih thu an tarlang bawk.

Meitei Heritage Welfare Foundation hian hemi chungchangah hian thuchhuah siamin, ministry of home affairs chu helpawlte nena SoO an ziah titawp mai tura ngenin, SoO tihtawp chu state mipuite tana himna tur zawk leh venhim hna thawktute tan pawha ṭha zawk a nih thu an sawi a ni.