Asom Gana Parishad hotu atan Atul Bora thlang nawn

Assam regional party, Asom Gana Parishad president atan president ṭanglai, Atul Bora chu thlan nawn a ni. Bora hi BJP kaihhruai Assam sorkarah cabinet minister ni lai a ni bawk.

Atul Bora hian thlan tlin a nih hnu hian Asom Gana Parishad chu Assam-a regional party awmchhun an nih thu leh, Sadiya leh Dubhri-a pawl ṭhuthmun nei an nih thu a sawi. "Assam-a regional politics hma hun chu kan hnathawh leh kal danah a innghat a ni. Hei vang hian nakin zela chak taka kan kal chhunzawm theih nan he party hi hmasawn zawnga kan kalpui a ngai. Party-a ka thawhpui zawng zawngte hnenah heti hawi zawnga hnathawk tur hian ka ngen duh bawk a ni," a ti.

Assam chief minister, Himanta Biswa Sarma pawhin AGP hruaitu thlan tharte hi lawmpuina hlanin, prime minister Narendra Modi hmathlir, Viksit Assam hlawhtlinna atana NDA-a an thawhhona pawh a ṭhat leh zual a beisei thu a sawi.

Atul Bora hi AGP-ah hian a zawna kum thum chhung party president a nihna a ni ta a ni. Asom Gana Parishad working president tur hian he dinhmun chelh mektu leh Assam sorkara cabinet minister ni ve bawk, Keshab Mahanta chu thlan tlin a ni ve bawk.