1961 hnu lama Manipur lutte thawn let an ni dawn : Manipur CM

Manipur chief minister, N. Biren Singh chuan tu pawh, an hnam leh sakhua thliarloin, kum 1961 hnu lama Manipur-a lut leh khawsate chu zawn chhuah a, an lo kalna lama thawn leh leh an nih tur thu a sawi.

Hetih lai hian Chief Minister Singh hian Myanmar aṭanga Manipur-a raltlan, state chhung hmun hrang hranga awm, mi 12,000 te chu a bitum nia hriat a ni. Hei bakah ṭhenawm state hrang hrang aṭanga Chin Kuki tribal zinga mi, dan loa Manipur-a pemte, document nei mumal si lote chu a bitum bawk niin an sawi.

CM-in thuchhuah a siamah hian 1961 chu Inner Line Permit (ILP) base year a nih thu leh, hemi mila dan loa Manipur-a awmte thawn let chu an thil tum a nih thu a tarlang a ni.

"Population com­mission din a ni a, anni hian Manipur ram leilung fa dik takte zawng chhuakin, dan loa lo pem lutte an thliar dawn bawk a ni. Population commission member-te hian in tinah kalin survey an nei ang a, ILP ṭanchhanin, 1961 chu base year-ah hman a ni ang," tiin a sawi.

Singh chuan,"Mipuite chu hlawm hnihah ṭhen an ni ang a, ram leilung fa leh awm nghet tawhah te ṭhen tur an ni. 1961 hmaa Manipur lo lut tawhte chu awm nghet tawh anga chhiar an ni ang a, 1961 hnu lama lo lutte erawh awm nghet anga chhiar an ni dawn lo thung," tiin a sawi bawk.

Manipur sorkar hian permit hrang hrang bakah data lak khawm chungchangah te, chhui zui kawngah leh ILP vil zui reng theih nan ILP portal a tlangzarh bawk a ni.