Tripura : Roman hawrawpa Kokborok tawng exam phalsak

Tripura sorkar chuan Tripura Board of Secondary Education (TBSE) exam buatsaiha tribal zirlai, Kokborok ṭawng exam turte chuan Roman hawrawpa an chhan theih tur thu a puang.

Tripura transport leh tourism minister, cabinet spokesperson ni mek bawk, Sushanta Chowdhury chuan press conference neihnaah he thu hi puangin, TBSE buatsaih board exam lo awm turah zirlaite, Kokborok ṭawng exam turte chuan Roman hawrawp emaw Bengali hawrawp emaw pawhin chhanna an ziah theih tur thu hi a sawi a ni. "He thutlukna hian sorkar chuan eng ṭawng pawh a zah em em tih a lantir a ni. Eng ṭawng pawh hian state tan pawimawhna an nei a, eng pawl pawhin bandh huaihawt turin chanvo nei mah se, nawrh hi harsatna chinfelna erawh a ni vek lo thung. Sorkar pawhin hemi chungchangah hian zirlai pawlte nawrh huaihawt tum chu sut turin kan ngen a ni," tiin a tarlang.

Minister chuan, "Chief Minister pawhin Roman hawrawp hman chungchangah hian CBSE chairman hnenah pawh hriattirna a thawn tawh a, chhanna kan nghak mek a ni. Roman hawrawpa an chhan theih loh avanga zirlai pawl lungawi lo leh, anmahni thlawptu zawng zawngte pawh bandh huaihawt tum hi kaltlangpui lo turin ka ngen duh che u a ni" tiin a sawi bawk. Chowdhury hian zirlai exam zingah, kum eng emaw zah chhung chu Roman hawrawpa chhang hi za zelah 2% aia hniam chauh an awm niin a sawi.