Sikkim : Assembly-ah private university pasarih dinna tur bill pharh

Sikkim hmun hrang hranga university pasarih din a nih theih nan Sikkim education minister, Kunga Nima Lepcha chuan assembly session neih mekah bill a pu lut.

Report-a tarlan a nih danin, heng university din tura ruahmante hian course hrang hrang an keng tel dawn a, chung zingah chuan; medical science te, information technology, management leh skill development te pawh a tel a ni. University din hi Sikkim-a zirna in hrang hrang chawikanna hmanrua ni tura beisei a ni a, April 2024-a state inthlan an neih tura atana sorkar laiin hmalakna a neih tarlanna tur nia ngaih a ni bawk .

Education minister-in session-a bill a put luh, private university pasarih din tura a rawtte chu; Mangan district-ah Orchid University, Melli district-ah Gurukul Vidhyapeeth University, Matrix Skilltech University (Geyzing district), Duke International University, Sikkim Medical Science University (Namchi district), Management & Information Technology University (Melli district), leh Gangtok bulah Shri Rukmani Dwarkadish University of Science & Technology te an ni. Bill sawihona leh vote lak erawh session neih leh hun atana tih a ni thung.