Assam : State fruit atan Kaji Nemu puang

Assam sorkar chuan Assam state fruit atan Kaji Nemu (Limbu) thlan a nih thu an puang. Kaji Nemu hi Assam state fruit anga hriat ṭhin a nih reng tawh thu Thawhlehni khan agriculture minister, Atul Bora chuan a lo sawi tawh a ni.

Assam assembly hian budget session an nei mek a, nimin kha session ni sarihna niin, cabinet minister, Atul Bora hian state cabinet-in Kaji Nemu chu Assam state fruit atana an pawm thu hi a puang a ni.

Chief minister Himanta Biswa Sarma chuan,"Sorkar chuan Kaji Nemu hi Assam state fruit atan a thlang a, a danglamna leh ṭhatna tam tak a neih bawk avangin Assam-a limbute hian kan thil eite a tikim bik em em a ni. State fruit atana puan a nih tak avang hian khawvel pum huapa thei zingah pawh tun hma zawng aiin a langsar zual tawh ngei ang," tiin X-ah a tarlang.

November 2023 khan Assam-a Directorate of Horticulture and Food Processing chuan India rama metro awmna khawpui lian zual palite nen Kaji Nemu nena thil dang inthlengna programme an lo siam tawh a, he hmalakna kaltlang hian thil hralh hmanga sumdawng leh mi thiam bik, Delhi, Mumbai, Pune leh Bengaluru-a mite rawih an ni.