Sorkarin NDFB(S) inbiakna neihpui dawn

Sorkar laipui chuan  National Democratic Front of Boroland(S) in tharum thawhna thlen ṭhin bansan a, sorkar nena inremna kawng zawn an duh ta chu lawmawm a tih thu sawiin, inbiakna pawh  neihpui thuai a ni dawn tih a sawi. 

NDFB(S) hi S Saoraigwra kaih­hruai niin, Assam-a Bodo helpawl pali zinga pakhat a ni. Bodo helpawl dang pathumte chu sorkar nen inkahhaina an puang mek a, Bodo buaina chinfel dan ngaihtuahin in­biakna an nei mek bawk. NDFB(S) hi Myanmar ramah an chetla nasa a, kumin January 11 khan Myanmar aṭangin active member 26 chu Myanmar-a an camp chhuahsanin India ramah an rawn kir a ni. 

An zingah hian an pawl president, general secretary, commander-in-chief leh finance secretary te pawh an tel. Chairman Saoraigwra chu Delhi-ah hruai thlak niin, Ningani khan inkahhai puanna, Suspendion of Operations (SoO) Agreement chu sorkar laipui leh Assam sorkar nen an ziak a ni. Myanmar aṭanga rawn kir, NDFB(S) member-te hi Lower Assam-a Army base-ah awmtir an ni.