Nagaland : CBI-in Addt. Secretary leh FOCUS hotute lakah eiruk thubuai ziak lut

Central Bureau of Investigation (CBI) chuan Nagaland Additional Secretary (Agriculture), Jitendra Gupta leh Fostering Climate-Resilient Upland Farming System (FOCUS) hotu pahnihte lakah eiruk thubuai ziak lutin an chhui chiang dawn.

CBI-in FIR an theh luhah heng mi pathumte hian thamna, Rs. vbc. 2 chuang laah puh a ni. CBI hian Air Intelligence Unit, Income Tax department aṭanga complaint an dawn avangin hma a la zui a ni.

Jitendra Gupta leh Veterinary Assistant Surgeon Auto Vihoi te chu Dec 17, 2023 khan Dimapur aṭanga New Delhi-an zin tur chu Income Tax Department lam hian an kut aṭangin sumfai ṭhahnem tak an mansak a ni. Sum fai an man hi Vihoi bag aṭangin Rs. nuai 34.50 niin, Rampaukai bag aṭangin Rs. nuai 21 leh Gupta bag aṭangin Rs. nuai 16 an man a ni.

Thuneitute'n thu an zawh fiah hnuah Vihoi chuan an pawisa kawl chu Gupta ta a nih thu a sawi a, FOCUS project lama a thurualpuite hnen aṭanga a neih niin a sawi. Vihoi chuan Dec 16, 2023 khan Gupta chuan pawisa chu an inah a pek thu leh, a tuk lama New Delhi lamah thlawhthlakpui turin a ti niin a sawi bawk.

Pawisa an mansak zinga mi, Rampaukai chuan an pawisa kawl chu Gupta pawisa a nih thu sawi ve bawkin Vihoi inpuanna a rawn nemnghet a, Gupta chuan project hrang hranga pawisa an lak chhuah dawnin a remtihpui man atan Gupta chuan pawisa a la ṭhin niin a sawi. CBI te'n FIR an ziah luhah hian Rampaukai hian project stakeholder-te aṭanga thamna sum a lak ṭhin thu leh, thla hmasa pawh khan Gupta hnenah hian R. vbc. 1.5 a theh luh thu an tarlang.

Jitendra Gupta hi IAS niin 2013 batch Bihar cadre a ni a, 2020 December khan Nagaland-ah hian dah a ni. Eiruk thubuai hi a vawikhat neihna a ni lo a, kum 2016 khan Bihar, Mohaniya Sub-divisional Magistrate anih la in truck overload laka a chet ṭhin dan avangin thubuai a lo nei tawh bawk. Mahse Delhi High Court chuan thiam chantirin Bihar aṭangin state danga sawn turin Bihar sorkar chu a hriattir thung a ni.