Tripura-a Kristian school-ah Hindu kût hman tumin vau

Hindu right-wing pawlte'n Tripura-a Christian Missionary School chu an sikul huam chhungah Hindu kut, Saraswati Puja hman a nih theih nan tharum hmanga an vau avangin sikull Principal chuan thuneitute hnenah ṭanpuina a ngen.

Vauna tawktu, Don Bosco School, Udaipur principal Terry Joseph chuan Gomati District Magistrate hnenah lehkha thawnin ṭanpuina a ngen a, Hindu Jagaran Mancha nia inchhalte'n an school chhehvel an rawn fan kual ṭhin thu leh, Saraswati Puja huaihawt an rawn dil ṭhin thu a sawi.

Terry Joseph chuan a lehkhathawnah chuan India danpui hnuaia Article 29 leh 30-in a humhim thu a sawi lang a, kum 1999 aṭanga Don Bosco Scool, Udaipur chu din a nih tawh thu leh Gomati district leh a chhehvel khua te'n hma an sawnpui theih nan theihtawp an chhuah ṭhin niin a sawi. Kristian sikulni mah se sakhaw hrang hrang zuitute tan pawh an inhawn reng thu a sawi lang tel bawk.

"February 8 khan Hindu Jagran Mancha nia inchhalte chuan kan sikulchu luhchilhin Saraswati Puja hman nan an rawn dil a, ka awm loh avangin Vice Principal hnenah an kal a, ani chuan Kristian sikulan nih avangin an theih loh tur thuin a lo chhang a ni. Mahse anni chuan Saraswati Puja chu an tihluihtir dawn tia vau chungin min kirsan leh ta a ni" tiin Principal chuan a sawi. Vawi tam tak nawr lui lo tura an ngen hnu pawhin an Puja chu sikul huamchhunga hman an tum tlat avangin thuneitu lam a pun ta mai niin a sawi.

Gomati District Magistrate Tarit Kanti Chakma chuan thil thleng chu a enfiah tur thu a sawi. Hetihlai hian Police OC Babul Das chuan,"Mi ṭhenkhat chu Kristian missionary sikulah kalin Saraswati Puja hman an dil a, a ṭul anga hmalak a nih hnuah chinfel a ni tawh. Puja chu school chhungah hman a ni lo" a ti.