Sorkar hnathawk singhnih chuang dah ngheh an ni dawn : Sikkim CM

Sikkim Chief Minister Prem Singh Golay chuan February 14 khan Regularisation Policy 2024 hmangin sorkarin a nghet loa department hrang hrang hnuaia a chhawr, mi singhnih (20,000) chuang chu February thla ral hma ngeiin dah ngheh vek an nih dawn thu a sawi.

CM Golay chuan sorkar hnuaia muster roll, Ad-hoc, One Family One Job, contractual workers, ICDS, ASHA worker leh CSS hnuaia thawktu te'n an ṭangkaipui tur thu sawiin, Regularisation Policy chu uluk taka sawiho a nih thu leh Sikkim chhunga hnathawktute hamṭhatna tura duan a nih thu a sawi. An policy thar hian sorkar hnuaia kum li thawk chin dah ngheh theihna dan a keng tel a, hei hian policy hluia kum riat thawk china bithliah chu a rawn thlak a ni.

Chief Minister hian sorkarin hna hrang hrang thawktute a ngaihtuah thu sawiin, "Regularisation Policy 2024 hi thupuan satliah ni loin dan a ni. December 31, 2023 hi policy inṭan hun a ni a, hemi hnua policy in a phut anga sorkar hna kum 4 lo thawk tling tawh chu dah ngheh theih an ni" a ti. Thawktu singhnih chuang dah ngheh an nihna tur chu cabinet ṭhu khawm pawhin a pawmpui tawh thu a sawi a, eptu lam chu eng tin nge hnaruak an siam tih leh eng tin nge hlawh an pek ang tih lama lo buai lo turin a chah zui bawk.

Sikkim CM chuan sorkar hnathawk dah ngheh turte tana hriattirna chhuaha an thu hman, 'maybe' tih eptu lamin sorkar beihna atana an hman chu chhang letin, sorkarin 'maybe' an hman chhan chu lehkha pawimawh tihfel a nih hma atan chauh a nih thu a sawi a, an ringhlel emaw dan pel a nih chuan court lamah eptu lam chu an zualko theih reng thu a sawi. Thawktu singhnih chuang dah ngheh an nihna tur chu eptu lam chuan duh loa dodalah a puh let thung a ni.