Manipur : Churachandpur-ah mipui thinrimin SP office luhchilh tum

Manipur-ah Ningani tlai khan mipui lungawi lote'n Churachandpur Superintendent of Police office luhchilh an tum. Head constable pakhat, ralthuam keng midang nena an awmhona video a darh avanga suspend a nih chungchangah mipui thinrim hian SP office hi an pan khawm a ni. Security force leh mipuite innawr buainaah hian mi pahnih an thi a, hliam tuar mi 30 chuang an awm.

Thuneitute sawi danin pung khawm hi 300-400 vel an ni a, venhimna lam kengkawhtute chuan mipui hnawh darh nan mittui tlakna hlo an hman a ngaih phah niin an sawi. Mipui lungawi lote hian SP office leh a chhehvela motor an hal bawk. Manipur police lam chuan thil thleng chu uluk taka an vil zui reng thu an sawi.

Head constable an suspend tak hi February 14 khan ralthuam keng midang leh, village volunteer-te nena an ṭhuthona video a darh a, hei vang hian Churachandpur SP Shivanand Surve chuan February 15 khan suspension order a tichhuak zui a ni. Head constable Siamlalpaul lakah hian Rule 66 Part III, Assam police Manual (APM) hmangin a chetdan chu enfiah a ni a, tiam chin awm loa suspend a ni.

Buai avangin internet tihtawp a ni

Churachandpur-a buaina chhuak avang hian Manipur sorkar chuan nimin aṭang khan ni 5 chhung awh turin internet service chu Churachandpur district huam chhungah tihtawp a nih thu an puang.

Sorkar thuchhuah hian buaina chuan ziaawm lam a pan theih nan leh, social media hmanga buaina tipunlun zawnga thu theh darh a nih lohna atan internet service chu tihtawp a nih thu an sawi.

Indigenous Tribal Leaders Forum (ITLF) chuan SP hnenah head constable suspension order chu sut leh turin an hriatir bakah Churachandpur district chu darkar 24 ral hma ngeia chhuahsan turin an ti bawk.