Tripura Chief Minister-in health scheme thar a puang

Tripura Chief Minister Manik Saha chuan Ningani khan state chhung mipui zawng zawng huamkim tur health scheme thar, Chief Minister Jan Arogya Yojana (CM-JAY) chu a tlangzarh.

Health scheme thar hnuaiah hian Ayushman Bharat-in a huam tel loh chhungkaw tam tak chu an tel dawn a ni. Manik Saha chuan,"Tripura hi state tenau zinga hetiang scheme kalpui hmasa ber kan ni a, scheme thar hian kalphung ṭha tak neiin hamṭhatna awm hi a dawngtu tur dik takte'n an ṭangkaipui dawn a ni" a ti. Chief Minister chuan CM-JAY chu Prime Minister Jan Arogya Yojana (PM-JAY) kalphung anga kalpui a nih thu a sawi a, PM-JAY hnuaia hamṭhatna dawng ve lote chu an scheme thar chuan a huam tel thu sawiin, tunah chuan Tripura mipui zawng zawng chuan dam lohna kaihhnawih avangin kum khatah insurance cheng nuai 5 thleng an dawng thei tawh dawn a ni, a ti.

Chief Minister chuan CM-JAY atan hian Rs. vbc. 104 dah hran a nih thu sawiin, hei hian state chhunga chhungkaw nuai 4.15 awmte chu a huam tel vek dawn tih a sawi. CM-JAY chuan Tripura chhunga sorkar hnathawkte pawh a huam tel theih thu a sawi a, mahse, sorkar hnathawkte chuan medical allowance, state sorkarin a pek chu an lak loh a ngai thung dawn a ni.

Health secretary Kiran Gitte chuan an scheme thar chu huapzo tak a nih thu leh, Tripura chhunga cheng zawng zawng tan hamṭhatna a ken thu te, dam lohna chi hrang hrang chu an scheme thar chuan a huamkim thu a sawi ve bawk.