Manipur : Tribal pawlin sorkar hnathawkte office kal lo turin hriattir

Indigenous Tribal Leaders Forum (ITLF) chuan police constable pakhat, Siamlalpaul suspend a nih chungchangah Manipur-a Churachandpur district-a sorkar hnathawkte chu nimin aṭang khan office kal lo turin an hriattir.

Siamlalpaul suspend a nih avang hian ITLF chuan lungawi lohna lantirin, February 15 khan Churachandpur-a SP leh DC office-te an bei a, buaina chhuakah hian mi pahnih an thih bakah mi 30-in silai kahna hliam an tuar bawk a ni. Lirthei ṭhahnem tak hal a ni a, sorkar bungrua eng emw zat tihchhiat a ni bawk. ITLF-te hian Siamlalpaul banna sut tur hian sorkar an phut bakah superintendent of police Shivanand Surve leh deputy commissioner Dharun Kumar te chu thlak turin an phut bawk a ni.

ITLF-in thuchhuah an siamah hian,"Sorkar hnena Siamlalpaul suspend a nihna sut tura kan hriattir hnuah darkar 24 a ral leh tawh a, Churachandpur SP leh DC-te pawh thlak turin kan hriattir bawk. Heti chung hian eng hmalakna mah an neih hriat a ni lo a, chuvangin sorkar hnathawkte chu office kai lo turin kan hriattir a, an kal luih avanga harsatna an tawk a nih chuan anmahni mawh a ni ang," tiin an tarlang.

Head constable, Siamlalpaul hi February 14 khan ralthuam keng tute emaw nen thingtlang khuaa volunteer-te nena an ṭhuho lai chu social media lamah a darh a, hei vang hian suspend a ni. Siamlalpaul chungchangah hian departmental inquiry neih mek a ni a, social media lama video a darh hnu hian suspend a nih bakah, danin a phal chin ang chauh hlawh lak phalsak a ni bawk a ni.