Sikkim : Hmeichhia leh ṭhalaite tana hamṭhatna tur tlangzarh

Sikkim chief minister, Prem Singh Tamang chuan World Bank puihna hmanga Sikkim-a hmeichhiate leh ṭhalaite tana hamṭhatna awm thei tur ruahmanna an siamte a tlangzarh.

CM Tamang hian hmeichhia leh ṭhalaite tan; Integrated Service Provision and Innovation for Revising Economics (INSPIRES) chu a tlangzarh a, hei hi planning and development department hmalakna rah a nih thu a sawi. "Sikkim-in INSPIRES kan neih hi kan zavaia thawhhona leh hmasawn tura, kan ke penna atana awmze nei zawka hmalakna a ni a, kan zavai atan kawngro a su dawn a ni," tiin a sawi.

Chief Minister hian INSPRIRES kaltlang hian kum nga chhung atan sorkar hnuaia department pakuate nen thawkhoin, Sikkim-a hmeichhiate leh ṭhalaite'n lei rem rap tura an dinhmun an siam theih nan a pui dawn a ni, a ti. He programme hmang hian hnathawk tura chhawr tlak ni tura training pek an nih ṭhin dawn bakah, institution nghet tak din te, kawng hrang hranga mipuite ṭhan zelna atana pawimawh, sector partnership neih te tum a nih thu CM Tamang hian a sawi bawk.