Northeast-a tribal pawl eng emaw zatin FMR chungchang ngaihtuah ṭha turin PM an ngen

Northeast-a tribal pawl hrang hrangte chuan Prime Minister Narendra Modi hnenah sorkar laipuiin Free Movement Regime (FMR) a tihtawp chu ngaihtuah ṭha turin an ngen.

Tribal pawlte hian sorkar laipuiin FMR titawp tura thutlukna a siam chu an lungawi loh thu leh, ramri km 1,643 zeta thui hung a ni tur chu an duh loh thu an sawi a, PM Modi hnenah hian ziakin an lungawi loh thu an thlen a ni. "Ramri hung hi thil, a taka chang thei tur ni lo leh, midang ngaihtuahna tel lo hmalakna a ni. 2018-a Act East Policy kaltlanga FMR kalpui tawh, tuna ṭhiah a ni hian ramri hnaiha chengte tan harsatna a siam a ni. Tun hma aṭang tawhin heng lai ramriah hian hnam leh chi khat, ram hrana awm site an khawsa a, an inzawmna hi tihchhiat a ni vek dawn a ni" tiin, India pawh United Nations Declaration on the Rights of Indigenous Peoples (2007)-a hming ziah hnantu a nih ve anga, ram leilung fate zah taka hma la tura an duh thu an tarlang.

Heng tribal pawl hrang hrang zingah hian Kuki Inpi Manipur, Zo Reunification Organisation (Mizoram), Kuki Inpi Nagaland, Indigenous Peoples of Mung-Dun-Chun-Kham, Assam, North East India (IPMDCKANEI), Manipur Naga Youth Organisation, Nagaland GB Federation, Nagaland Tribes Council, Eastern Nagaland People’s Organisation, Senior Citizens Association Nagaland, United Naga Tribes Association on Border Areas, Project Constitutional Justice, The Naga Rising, Chakhroma Youth Organisation te an tel a, February 16 khan inhmu khawmin, Dimapur-a Nagaland Indigenous People’s Forum (NIPF) te chuan inhmuh khawm hi an huaihawt a ni.