Nagaland : Sorkar hnathawkte'n NPS duh lohna lantir

Nagaland National Pension System Government Service Employees' Forum (NNPSGSEF) te chuan Old Pension Scheme (OPS) aia New Pension Scheme (NPS) hman an duh lohna lantirin, NPS chuan sum leh paiah an dinhmun a tihngheh loh thu, pension-te tan pension hlawh a hniam phah thu an sawi.

Nagaland National Pension System Government Service Employees' Forum (NNPSGSEF) hmalakna hian sorkar hnathawk, kum 2010 hnu lama lak tharte chuan February 26-a 14th Nagaland legislative assembly session neih tur denchhenin, Kohima-a civil secretariat junction-ah lungawi lohna lantirin an pung khawm a ni. Nawr huaihawt hi ram pum huapa All India State Government Employees Federation (AISGEF)- te nawrh huaihawt nen a inrual a ni. NNPSGSEF hian Spetember 2023 khan state sorkar hnenah NPS hman an duh lohna hi an lo thlen tawh a, vawiin thlengin chhanna an la dawng lo niin an sawi. OPS chuan pension hnu thlenga hlawh pangngai tak a la pek avangin, hnathawkteah hahdamna a pek thu leh NPS chuan hetianga anga hahdamna hi a pek theih loh thu leh, thla tina pension hlawh an lak ṭhin chu a tlem fal thu an sawi.

Sikkim chief minister, Prem Singh Tamang chuan April 1, 2006 leh a hnu lama sorkar hnathawka lakte tan OPS hman a nih leh tur thu hi a lo puang tawh a, hei vang hian sorkar hnathawk, 2010 hnu lama lakte pawhin OPS hman hi an phut ve leh a ni. Sikkim hi Northeast state zinga OPS hmang leh hmasa ber an ni.