Manipur sorkarin 'No Work-No Pay' kalpui dawn

Indigenous Tribal Leaders' Forum (ITLF) -in Churachandpur-a sorkar hnathawkte pisa kai lo tura a hriattir hnuah, Manipur sorkar chuan sorkar hnathawk, chhan awm loa pisa kai lo chu hlawh an pe dawn lo tih a sawi ve thung.

Manipur chief secretary Vineet Joshi chuan state chhunga sorkar pisa zawng zawng chu Thawhṭanni aṭanga khar vek tura ITLF -in thu an chhuah chu state sorkar chuan a lo hmu ve a, sorkar chuan thuchhuah dang kan siam ve ta a ni, a ti. Sorkar thuchhuah ngai pawimawh lo an awm a nih chuan dan anga hmalak a ni dawn tih a sawi bawk. State sorkar leh sorkar laipui hnuaia hnathawk bakah state sorkar hnuaia institution, Autonomous bodies leh establishment hotute pawh an hnuaia thawkte chu ṭha taka pisa kai tura hriattirin thu an pe bawk a ni.

ITLF hian Churachandpur district huam chhunga sorkar pisa zawng zawng chu Thawhṭanni aṭangin, tiam chin awm loin khar vek turin hriattirna a tichhuak. He an hmalakna chungchangah hian thil phut pahnih an nei a - Head Constable Siamlalpaul suspension order sut leh, Churachandpur Superintendent of Police Shivanand Surve leh Deputy Commissioner S. Dharun Kumar chu sawn an ngiat a ni.

Churachandpur buaina chhuichian a ni dawn : Manipur CM

Manipur chief minister N. Biren Singh chuan Churachandpur buaina chhuak avanga nunna chan an awm chu chhui chian a nih dawn thu a sawi a, heng bakah hian Manipur Police Training College (MPTC), Pangei leh 5th IR battalion headquarters, Chingarel a ralthuam ruk chhuah tumna pawh chhui a nih dawn thu a sawi.

Chief Minister chuan Secretariat a thu thar thehdarhtute a kawmnaah Churachandpur-a buaina chhuak chu pawi a tih takzet thu sawiin, uluk taka chhui chian a nih hnuah inhnamhnawihna nei leh thiam loh chantirte chu dan anga hrem an nih vek tur thu a sawi. CM chuan Churachandpur SP-in social media kaltlangin vauna a tawk tih sawiin, hetiang ti duh an awm chu pawi a tih thu a sawi a, a kaihhruai sorkar chuan dan kengkawhtute chunga vauna thleng chu a en liam mai mai dawn lo tih a sawi bawk.

Biren Singh chuan ITLF -in Churachandpur SP hnena point 24 awmna ultimatum an pek chungchangah sorkar chuan thuneitute vauna chu a ngai thutak hle tih a sawi. Pangei leh Chingarel-a buaina chhuak kaihhnawihah mi suspend an neih tawh thu a sawi bawk a ni.