Hlawh lak loh rei avangin GHADC hnuaia hnathawk an lungawi lo

Meghalaya-a Garo Hills Autonomous District Council (GHADC) hnuaia thawktute chu hlawh an lak theih loh avangin an lungawi lo a, budget session lo awm turah hian an harsatna sutkian nan hmalakna a awm lo a nih chuan nawrh huaihawt an tum.

Non-Gazetted Employees Association (NGEA) chuan kar leh lamah hian hnathawh loh hmanga sorkar nawr an tum chu ṭhulh rih a nih thu sawiin, budget session lo awm tur chu an nghak phawt dawn tih an sawi. NGEA chuan sorkarin an hlawh a bat tling khawm chu thla 32 hlawh a nih thu leh, December 2023 khan thla hnih hlawh an pek thu sawiin, chu chu an hlawh lak hnuhnun ber a ni, an ti. January 2024-a thla hnih hlawh dang pek leh an tumna an tihhlawhtlin loh chhanah NPP kaihhruai Executive Committee chu an puh bawk.

Chief Executive Member, Albinush R Marak chuan NGEA puhna chu a dik lo ni a sawiin, January-a thla hnih hlawh an pek theih loh chhan chu sum an neih loh vang leh hlawh pek chungchangah chuan state puihna an mamawh thu a sawi. A kaihhruai Executive Committee (EC) chuan thawktute thla 32 hlawh an bat chu pek tlak ngei an tum thu a sawi a, hei bakah hian term hmasaa EC chu tuna an buainaah hian a mawhphurtu an nih thu a sawi tel bawk a ni.