8th schedule-a Khasi leh Garo ṭawng telh phutin Meghalaya-in MHA hnenah lehkha vawi riat thawn tawh

Meghalaya chief minister Conrad K Sangma chuan a kaihhruai sorkar chuan India danpui chhunga 8th Schedule hnuaiah Khasi leh Garo ṭawng telh an ni theihna atan hma an la chhunzawm zel tih a sawi.

Chief Minister Sangma hian assembly session neih meka zawhna a chhannaah, Khasi leh Garo ṭawng telh chu hmalakna kal mek a nih thu a sawi a, hemi kaihhnawihah hian sorkar laipui hnenah lehkha vawi 8 lai an thawn tawh thu a sawi bawk. Khasi leh Garo ṭawng telh a nihna tur resolution hi kum 2018 khan Meghalaya assembly hian a pawmpui tawh tih Sangma chuan a sawi a, sorkar laipui lam pawhin 8th schedule hnuaia ṭawng dah a nih theihnan hian tehfung a awmlo tih an hrilh tawh thu a sawi bawk.

Meghalaya CM chuan sorkar laipui lamin an House ngenna chu a pawmpui a rin thu a sawi bakah, Khasi leh Garo ṭawng chu Ministry of Home Affairs (MHA) in 8th schedule a telh a ni dawn em tih a ngaihtuah tur tawng 38 zingah a tel sa tih a sawi. Tunah hian 8th schedule hnuaiah hian ṭawng 22 a awm mek a, chungte chu - Assamese, Bengali, Gujarati, Hindi, Kannada, Kashmiri, Konkani, Malayalam, Manipuri, Marathi, Nepali, Oriya, Punjabi,Sanskrit, Sindhi, Tamil, Telugu, Urdu, Bodo, Santhali, Maithili leh Dogri te an ni.