Manipur tribal hruaitute'n pisa kai lo tura an ngenna sût

Manipur tribal hruaitute chuan sorkar hnathawkte pisa kai lo tura an ngenna chu an sût tih an puang.

Tribal hruaitute hian police head constable suspend a nih avangin sorkar hnathawkte chu office kal lo turin a lo ngen tawh a ni. Churachandpur leh Pherzawl district- ahte chuan tun kar tir lam khan ITLF ngenna zawmin, pisa kai an tlem hle nia sawi a ni.

Indigenous Tribal Leaders Forum (ITLF) chuan an thuchhuahah,"Mipui tana a ṭhat zawk kan rin avangin sorkar pisa khar kan phutna chu tun aṭangin tihtawp a ni e" an ti. Hemi rual hian ITLF chuan Churachandpur Superintendent of Police leh Deputy Commissioner thlak chu an la ngiat reng thu an sawi a, head constable an suspend pawh sut an la phut reng tih an sawi.

Churachandpur district-a February 15-a buaina chhuak chu pawi an tih thu ITLF chuan an sawi a, buaina chhuakah hian inhnamhnawihna an nei lo tih an sawi zui bawk. Mipuite chu hetiang buaina chawk chhuak tawh lo tura an duh thu leh, hetianga che ṭhin chungah hma an lak zel tawh tur thu an sawi a ni. Head constable, Siamlalpaul chu ralthuam keng midang nena an awmho lai video darh avanga supend a ni a, suspend a nih chhan hi duh loin tribal-te hian lungawi lohna lantirin, buaina nasa tak a chhuak zui a ni.

Manipur chief minister N Biren Singh chuan buaina chhuak chu a dem takzet tih a lo sawi tawh a, buaina chhuak chu tum mumal tak nei nia a rin thu a sawi bakah sorkar lehkha pawimawhte chu tihchhiat a nih loh nan venhim tlat a nih tur thu a sawi. Manipur sorkar hian buaina chhuak hi chhui chiang tur a ruat tawh a, ni 30 ral hmain buaina chhuah chhan leh buainain nghawng a neih dan tarlanna chu sorkar hnenah theh luh a ni ang.