Manipur : Electric shock hmangin pung khawm hnawt darh

Manipur khawpui, Imphal-ah mipui lungawi lo pung khawm hnawh darh nan electric shock device an hmang, hei hi venghimtu lamte'n buaina nasa zawk a chhuah loh nana ti an ni.

Mipuite hi ralthuam ruk thubuaia mi paruk man chhuah ngiata kal khawm an ni. Venghimtu lam nen an innawr buai hnuah venghimtu lam hian electric shock device hi an hmang a, hliam eng emaw zat an awm phah a ni. Cheirap court complex, Imphal West-a pung khawm zinga a tam zawk chu hmeichhia an ni. Hliam tuar zingah hian hmeichhia pasarih, journalist leh lawyer te chu damdawi in hnai berah rang taka hruai an ni.

Mipui lam hian ralthuam ruk chhuah thubuaia man tawkte chu court-in ni 15 chhung police kawl a phalsak thu an hriat hnuah lungawi lohna lantir tur hian an pung khawm a ni. Manipur sorkar chuan ralthuam ruk chhuah thubuai hi a chhui chiang dawn tih a lo sawi tawh bawk.

Manipur Bar Association chuan court huam chhungah venghimtute'n tharum an hmang chu an dem tak zet tih sawiin, dan kalh a ni a, a bultumtu chuan mawhphurhna a la ngam se an duh thu an sawi.