Assam : APSC-in exam a buatsaihah thil thar a hmang dawn

Assam Public Service Commission (APSC) chuan a vawi khatna atan exam a buatsaihah, exam hmachhawntute tan OMR sheet-a an chhanna hriat theih nan carbon copy a hmang tel tawh dawn.

Hetiang hmalakna hi March 17-a neih tur; Combine Competitive (Preliminary) Examination, 2024-ah hman ṭan a ni dawn a ni. Exam hmachhawntu zirlaite'n OMR sheet a an chhanna ang chiah carbon copy chu an hawn thei dawn a, hei hian zirlaite inen letna kawngah thui takin a pui thei dawn a ni. APSC exam-ah hian Assam cabinet-in kum 2022-a a lo rel angin optional subject a awm tawh lo a ni.

APSC-in Prelims exam a buatsaih turah hian exam tum zirlai 67,252 an awm a, post ruak 235 an inchuh dawn a ni. Heng post-te hi - ACS, APS, Superintendent of Taxes, Superintendent of Excise, AFS, BDO, ARCS leh AAO te hi an inchuh tur a ni. Prelims exam hi Assam chhunga district 32-ah buatsaih a ni ang. APSC chairman, BB Dev Choudhury chuan nodal officer-te chu harsatna thleng thei laka inven nan exam centre aṭanga metre 100 chinah CrPC Section 144 puang tura thurawn a pek thu a sawi. Assam hian APSC exam atan hian thil thar en chhin an hreh lo hle a, Assam cabinet-in kum 2022 khan optional subject tihtawp a rel angin APSC exam-ah hian optional subject a awm tawh lo a ni.