Meitei hnam tribal nihna pek chungchangah Manipur High Court-in a thuchhuah tidanglam
Manipur High Court chuan Meitei hnam Schedule Tribe huamchhunga telh ve tura Manipur sorkar thurawn a lo pek tawh chu a tidanglam. He thutlukna hi Nilaini khan high court bench chuan siamin, India rama dan rorelna in sang ber, Supreme Court-in ngaihtuah ṭha tura a duh bakah tribal pawl hrang hrangin High Court thupek chu en ṭhat leh an phut hnuah he thutlukna hi an tichhuak ta a ni.
Inhnialna tam tak chawk chhuaktu, High Court thupek hi nikum March thla khan tihchhuah a ni a, Paragraph 17(iii)-ah Manipur sorkar chu Meitei-te tribal mi nihna pek chungchang ngaihtuah ṭha turin a ti a ni. Mahse a thupek lo siam tawh hi high court bench chuan a sut leh ta a, hetih lai hian a thupek dang, Meitei tribal nihna pek chungchanga sorkar laipui hnena chhanna pe tura Manipur sorkar a hriattirna chu sut tel lo thung.
All Manipur Tribal Students Union (AMTSU) chuan chuan thupek tihchhuah tawh zingah paih la ni ve lo ṭhenkhat chu court-in a thupek tawh a sut leh ang thoa buaina chawk chhuak thei a ni, an ti. AMTSU chuan Paragraph 17(iii) chu paih ni tawh mah se, awmzia tak tak a la nei chuang lo an ti a, court-in paragraph a paih tel lo pawh hian sorkar chu Meitei telh tura nawr a la ni tho niin an sawi. Tribal-te chuan court-in a thupek ṭhenkhat chauh a paih chu thupek pumpui hmang lo tura an khinna tihkhawtlaina mai a nih thu an sawi a, thupek pumpui sut leh chu an la ngiat reng thu an tarlang.
High court bench-in Nilainia thupek thar a tihchhuah hian inhnialna a chawk chhuak rang hle a, ṭhenkhat chuan Manipur buainain ziaawm lam a pan theihna atan a pawimawh a ni ti mah se, ṭhenkhat erawh chuan court thupek thar chu a ṭha tluantling lo niin an sawi ve bawk. Meitei petitioner-te leh sorkar laipui chuan thupek thar chungchangah hian engmah sawi an la nei lo. March 2023-a High Court thupek khan lungawi lohna leh dodalna a chawk chhuak nasa hle a, tuna court thupek thar siam leh pawh hian Manipur buaina thleng mekah nghawng a neih leh ngei rin a ni.