Ṭawng chi hrang lenna zirna kalpui hi sorkar tum dan a ni : Tripura CM

Tripura chief minister Manik Saha chuan an state chhungah New Education Policy, 2020 thil tum zinga pakhat, ṭawng hrang hrang tel theih dana zirna kalpui chu an ngai pawimawh dawn tih a sawi.

International Mother Language Day lawmnaa thu a sawinaah Chief Minister chuan he thu hi sawiin, a kaihhruai sorkar chuan eng hnam ṭawng pawhin hma a sawn theih nan hmalak an tum a ni, a ti. Zirlaite chuan tribal ṭawng chi hrang pariat zinga an duh ber hmangin lehkha an zir theih tawh thu a sawi.

Chief Minister chuan,"NEP, 2020 khan ram pumah ṭawng chi hrang hrang hmanga zirna kalpui ṭulzia a tarlang a ni" tiin, state sorkar chuan hnam tlem zawkte ṭawng chu humhim a ṭulzia leh pawimawhzia a hriat thu a sawi a, heng ṭawng humhalh kawngah pawh hma an lak thu a sawi bawk. Saha chuan pianpui ṭawng humhim chu hnam nunphung vawnhim nan a pawimawh a, an state chhunga hnam tlem zawk ṭawng vawnhim chu an ngai pawimawh hle tih a sawi a ni.

CM Saha chuan sorkarin state chhunga ṭawng zawng zawng humhim a intiamna kawng khat atan Kokborok ṭawng chu primary sikul 1296, secondary sikull 115 leh higher secondary sikul 65-ah a zir theih tawh dawn tih a puang bawk.