Assam Assembly-ah Healing Practices Bill an pu lut

Assam Parliamentary Affairs minister Pijush Hazarika chuan Nilaini khan Assam Healing (Prevention of Evil) Practices Bill, 2024 chu Assembly House-ah a pu lut. He bill hian thilmak hmanga tihdam rawngbawlna chu khap a tum ber a, hei hian sakhaw rindan theh darh khapna pawh a huam tel thei dawn a ni.

An Bill put luh hian state chhung mipuite chu zir chianna awm lo leh tunlai thiamna ni lo hmanga an damlohna enkawl ṭhin chu khap a tum a, thil dangdai leh zir chianna mumal awm lo hmanga natna enkawl ṭhin chu tihtawp a tum dawn a ni.

Assam Healing (Prevention of Evil) Practices Bill, 2014 hnuaia hriat tur pawimawh zualte chu - Section 3 chuan state sorkar chu hetiang hmanga natna enkawl chu dan pawna a hnawl a phalsak a, Section 4 chuan hetiang hmanga damlo enkawl ṭhinte'n hriattirna an chhuah chu a phal lo bawk. Section 5 hnuaiah chuan hetiang ti ṭhin chu hrem an nih tur thu a inziak a, Section 6 chuan a hremna tarlangin - kum thum jail tan emaw Rs. 50,000 chawitir emaw a pahnih hmanga hrem theih an nih thu a inziak a, hrem an nih tawh hnua ti nawn leh chu kum nga chhung jail tantir emaw Rs. nuai 1 chawitir emaw hremna pahnih kaihkawpa hrem theih an ni bawk. Section 9 chuan state chu police officer tu pawh hetiang thubuai enfiah tura ruat theihna thu a pe bawk a ni.

Assam Christian Forum chuan Chief Minister-in thilmak hmanga tihdamna kalpui leh sakhaw theh darh kalkawp anga a ngai chu pawi an ti takzet a, CM thil thlir dan chu fuh lo leh rilru hruai kawi thei a ni, an ti. Christian Forum chuan tihdamna chu mihring tawrhna tihziaawm nana chung lam thil thlawn pek a nih thu leh, eng sakhua pawh an len thu an sawi a, ṭawngṭaina chu tihdamna hmanrua chauh ni loin, an rinna tichaktu leh hringnuna hahchawlhna thlentu a nih thu an sawi bawk.