Nagaland : Medical college sak nan Japan aṭangin ṭanpuina hmu

Nagaland Institute of Medical Sciences and Research, Kohima ah Medical College Hospital (MCH) din a nih theih nan Japan International Cooperation Agency (JICA) chuan Rs. vbc. 564 chuang an puktir dawn.

Sum puk tura inremna hi finance ministry-a additional secretary Vikas Sheel leh JICA India chief representative SAITO Mitsunori te'n an ziak a ni.

JICA chuan an thawh dunna chuan Nagaland mipuite tan hriselna kawnga hmasawnna kawng a hawn belh ngei an beisei thu an sawi. Japanese agency leh Nagaland Institute of Medical Sciences and Research-te hi February 2024 aṭangin October 2035 thleng an thawkho dawn a ni. JICA chuan Nagaland chauh ni lo, India ram pum chuan hriselna huanga hmasawnna an hmuh an duh thu leh mi zawng zawng ban phak inenkawlna ṭha chhawp chhuah an tum tih an sawi bawk.