Nagaland Kristiante'n Assam CM ṭawngkam an ngaimawh

Nagaland-a Kohhran lian ber; Nagaland Baptist Church Council (NBCC) chuan Assam Chief Minister-in Assam Healing (Prevention of Evil) Practices Bill, 2024, 'dan pawimawh tak a ni' a ti chu sakhaw dang ngaih theih lohna chiang taka lantirtu a ni, an ti.

Assam CM hian thuthar thehdarhtute a kawmnaah Assam-in thilmak hmanga tihdam rawngbawl khap nana bill an pass-in a tum pakhat chu sakhaw rindan thehdarh khap a nih thu a sawi, hei hian Kristian missionary-te chanchinṭha hril chu a bitum ber pakhat niin a ngaih theih. Hei vang hian NBCC chuan hetiang bill Assam assembly-ah put luh a ni hi Kristian nek chepna hmanrua a nih thu an sawi. Hemi bakah hian Kristiante'n tihdam rawngbawlna an kalpui ṭhin chu hnam tlem zawk an sakhuaa inleh tirna hmanrua anga ngaih a ni chu pawi an ti hle tih an sawi bawk.

NBCC general secretary, Rev. Dr. Zelhou Keyho chuan an thuchhuahah,"Hmarchhak state-te huikhawm tumtu mi pawimawh takin hetiang thu a sawi mai hi pawi kan ti" tiin, tihdam rawngbawlna hi Kristian sakhaw ken tel pawimawh tak leh, tihdamna hian thlei bik a nei lo a, mi zawng zawng huap rawngbawlna a nih thu an sawi. An thusawi chu ramchhung hmun hrang hranga Kristian damdawi in din chuan a tihchian thu sawiin, heng damdawi inte hian mi hniam zawkte ban phak turin inenkawlna ṭha an chhawp chhuah thu an sawi. NBCC chuan,"Hetiang hmalakna zawng zawng karah hian state pakhatah hetiang dan put luh a ni mai hi inenhranna satliah mai ni loin phuba lak tumna a ni" an ti.