Meghalaya-ah Lokayukta-in a nih dan tur ang takin hna a thawk tawh : Meghalaya CM

Meghalaya chief minister Conrad Sangma chuan, sorkarin kum 2021-a Meghalaya Lokayukta Act a siam ṭhat hnuah Lokayukta chuan a thawh tur ang takin hna a thawk thei tawh niin a sawi.

CM Sangma hian an state Lokayukta dan siam ṭhat chu state dang; Sikkim leh Haryana-a member pakhat chauh awmna Lokayukta zul zuia siam a nih thu a sawi bawk. Hemi bakah hian Lokayukta chhunga nihna - Chairperson, Secretary, Director of Inquiry leh Director of Prosecution chelhtu turte ruat an nih tawh thu a sawi bawk.

Sangma chuan Lokayukta hnathawh tawh chin a tarlang bawk a, thubuai 38 ziak lut tawhin, heng zinga 27 chu chinfel a ni tawh a, a bak 11 chu chhui chianna kalpui mek a ni, a ti. Lokayukta chu eirukna do tura thuam chak bakah hna ṭha taka thawk thei turin Lokayukta dan chu siam ṭhat zel theih a nih thu a sawi.