Manipur hmeichhiain Delhi-ah lungawi lohna a lantir

Manipur tualchhung buainain ziaawm lam a pan theih nana hma la tura Prime Minister nawrna atan, Manipur hmeichhe pakhat, Malem Thongam chuan Ningani khan chaw ngheiin Delhi-ah lungawi lohna a lantir.

Malem Thongam hi kum 23 mi niin tunah hian Delhi-ah lehkha zirin a awm mek a, Arts Faculty of Delhi University-ah chaw nghei hmang hian lungawi lohna hi a lantir a ni. Lungawi lohna lantirna hi Lamyanba Irawat Memorial Intergrated Trust (LIMIT), Delhi Meitei Coordinating Committee leh Delhi-a cheng Meitei ṭhenkhat chuan an ṭawiawm. Sorkar laipuiin Manipur buaina chhuak chinfelna ṭha tak a chhawp chhuah hma loh chuan chaw nghei chu an chhunzawm zel dawn tih Thongam chuan a sawi.

Manipur buaina hian thla 10 liam hnu pawhin ziaawm lam a la pan thei lo a, Meitei leh Kuki inkara remna a awm theih nana hmalakna mumal awm lo chu pawi a tih thu a sawi. Thongam chuan buaina avang hian mi 200 chuangin nunna an chan tawh thu leh, mi 61,000 chuangin an in leh lo an tlanchhiatsan thu a sawi bawk.