Arunachal-ah helipad siam belh a ni dawn

Sorkar laipuiin Arunachal Pradesh chhunga boruaka inkalpawhna tihhmasawn a tumna kawng pakhat atan, helipad pakua siam zawh a nih hnuah a dang paruk siam belh a ni leh dawn tih an tarlang.

Heng helipad siam hian Indo-China ramriah rang taka sipai thawn luh a nih theih nana pui thei tur a nih dawn avangin helipad-te hi ramchhung him nan leh, a bik takin hmarchhak him nan an pawimawh hle a ni. Hemi bakah hian ralthuam leh ṭul dang bakah mamawh hrang hrang rang taka thawn luh a nih theih nan a pawimawh hle a, kawng ṭha a awm lohna hmun kalpawh nan helipad pawimawhna hi a sang leh zual a ni.

Tun dinhmunah Indian Army-te hian Arunachal Pradesh-ah hian helicopter chi hrang hrang Cheetah, Chetak, leh Advanced Light Helicopters (ALH) te an hmang mek a ni.