National Board for Wildlife-in Assam-ah project panga a pawmpui

Assam chief minister Himanta Biswa Sarma chuan an state chhungah project pawimawh tak tak panga kutthlak ṭan a nih theih nan National Board for Wildlife (NBWL)-in a pawmpui tih a sawi. Heng project-te hi inkalpawhna ṭha a awm theih nana hnathawh tur pawimawh tak an nih thu Sarma chuan a tarlang.

Chief Minister chuan X lamah thuchhuah siamin,"Vawiin hi Assam tan ni chhinchhiahtlak tak a ni. NBWL-India ramchhunga nungcha enkawl kawnga hotu lu ber chuan Assam tana project pawimawh tak tak panga a pawmpui a ni" a ti.

Heng project pawmpui takte hi Chapaguri-Amteka Asom Mala road extension - Bhutan ramri bul thlenga siam tur te, Kaziranga National Park hrula elevated corridor siam, Guwahati Ring Road project bakah Deepor Beel Railway Elevated Railway Corridor leh Deepor Beel Elevated Railway Corridor te an ni. Heng project-te hian ramsa chenna a paltlang dawn avangin National Board for Wildlife hian pawmpuina an pek a ngai a ni.