Kristiante'n India danpui hnuaiah school an hawng thei - Assam Adivasi hotu

Assam Legislative Assembly-ah Kristian nek chepna tur nia ngaih Assam Healing (Prevention of Evil) Practices Bill, 2024 pharh a nih hnuah, Kristian missionary sikul laka dodalna poster campaign a awm leh a, mahse, hemi karah hian Adivasi Kristian hruaitu pakhat chuan India danpui chuan zirna in din a phalsak thu sawiin a chhang let.

Hindu sakhaw be zinga kalfawr pawl pakhat, Sanmilito Sanatan Samaj chuan Guwahati, Dibrugarh, Barpeta, Jorhat, Sonari, Sivasaagar leh hmun dang ṭhenkhatah poster campaign neiin missionary-te chu an sikul huamchhunga Kristian sakhaw kaihhnawih milim leh chapel-te chu dah bo turin an hriattir a, zirna in chu sakhaw biakna hmuna chhuah lo turin an hrilh. Heng bakah hian Sanmilito Sanatan Samaj chuan Father leh Sister, sikula thawkte chu sikul huamchhungah an incheina thlak turin an ti bawk.

Sanmilito Sanatan Samaj poster tar pakhatah chuan,"Sikul hi sakhaw biak nana hmang tawh lo tura kan inhrilhna hnuhnung ber tur a ni ang. Sikul leh a chhehvel aṭangin Isua lim, Kros, leh a dangte dah bo ni se, hemi bakah hian Bharat dodalna leh India danpui kalha chetna a awm tur a ni lo bawk" tiin an ziak. Kutumba Suraksha Parishad hruaitu Satya Ranjan Borah-a'n ni 10 chhung Isua leh Mary lim bakah Kros chhinchhiahna chu missionary sikul leh zirna in hmun dang aṭanga dah bo tura a hriattir hnuah, poster campaign hi an nei leh a ni.

North East Regional Catholic Council (NERCC)-a executive member hlui leh All Adivasi Student Association of Assam (AASAA) president hlui ni bawk, Raphael Kujur chuan, Sanmilito Sanatan Samaj thil phut chu awm lo a tiin India dan kalh a nih thu a sawi a, hetiang buaina hi pawi a tih thu leh an duh loh thu a sawi. Kujur chuan Kristiante hian zirna in chu an duh dana an kalpui chu India danpuiin a phalsak thu a sawi a, chutiang behchhan chuan missionary sikulte chu kalpui an ni, a ti. "India danpui Article 29-na hnuaiah minorities-te chuan sakhua emaw, ṭawng emaw behchhana zirna in dina, an duh dan a kalpui a phalsak a ni," tiin a sawi. Tun hnaia missionary sikulte'n vauna an tawk chu pawi a tih thu leh, an puhna chu dawt leh ṭanchhan nei lo a nih thu a sawi bawk.

Raphael Kujur chuan,"Missionary school huatna neitute hian kum 200 liam ta chhunga heng sikulte'n ram tana an hnathawh an haider a ni. Heng sikul hian India ramchhung hmun hrang hrangah mi zawng zawng huap zirna an pe a, hmasawnna an thlen a ni" a ti. Missionary sikul chuan Hindu, Muslim, Sikh, Buddhist leh Kristian ṭha tak ni tura an zirtir ṭhin thu sawiin, inhuatna chuan an zirtirnaah hmun a chan loh thu a sawi. Kujur chuan,"Inhmangaih tawn tura inzirtir hi Kristian sakhaw rinna bulpui a ni. Missionary sikulte'n India ram hmasawnna atana an hnathawh, a dik lo zawnga lantir tumna hi a ṭha lo a ni" tiin a sawi.