Manipur : Naga leh Kuki-Zo MLA-te Guwahati-ah inhmu khawm

Manipur-a Naga MLA panga leh Kuki-Zo MLA pakua chu Zirtawpni khan Guwahati-ah Manipur buaina chungchangah an inhmu khawm. Buaina a ziaawm theihna atana hmalakna awmte an sawiho.

Inhmuh khawmnaa Naga MLA telte chu - Minister Awangbow Newmai, Hill Areas Committee (HAC) Chairman Dinganlung Gangmei, MLA, Ram Muivah, MLA, Leishiyo Keishing leh MLA, L Dikho- te an ni. Kuki-Zo MLA lamah MLA, V Valte chu enkawl mek a nih avangin a tel thei lo a, a bak MLA-te chu an kim a ni.

MLA inhmu khawm hian thil tam tak an sawiho a, chung zingah chuan Hill Areas Committee (HAC) chu pawimawh berin hemi bakah hian zalen taka inkalpawh theihna (FMR) tihtawp a nih chungchang leh, an state chhung buaina chungchang te an sawiho bawk a ni. Kuki-Zo MLA-te chuan an mipuite'n an tawrhna te an sawi lang a, buaina chin fel thuai chu an duh dan a nih thu an sawi a ni. Naga MLA-te hian Metei pawl pakhat, COCOMI hruaitute nen Manipur chungchang hi an sawiho leh dawn a ni.