Assam assembly-in Assam Healing Bill, 2024 a pass

Assam budget session neih mekah Bill sawi zui hlawh tak Assam Healing (Prevention of Evil) Practices Bill, 2024 chu nimin khan pass a ni. He dan hian science hmanga finfiah loh tihdamna kaihhnawih reng reng chu dan pawnah a hnawl a, mi tu pawh tihdamna nei nia inchhala, damlo a enkawl a nih chuan hrem theih an ni dawn a ni.

He dan thar hnuaiah hian tihdamna nei ṭhinte chu hrem theih an ni dawn a, vawi khat man an nihnaah kum khat lung ina tan emaw Rs. 50,000 chawi emaw, a pahnih hmanga hrem theih an ni ang. An tihsual vawi hnihnaah chuan kum nga lung in tan emaw, Rs. nuai 1 thleng chawitir emaw, a pahnih kaikawpa hrem theih an ni ang.

Congress legislature party leader, Debabrata Saikia chuan bill chu Assam-a Uniform Civil Code hman a nih theih nana hmahruaitu tur pakhat a nih thu a sawi a, bill chhungah chuan 'evil practice' tih inziak chu sawi fiahna mumal a awm loh thu leh Assam-a cheng hnam hrang hrangte chuan hmasang aṭanga inrochun natna enkawl dan an neih thu a sawi. Heng inenkawlna hi bill thar chuan a huam dawn leh dawn loh a chiang lo tia sawiselna a nasa hle a ni.

Chief minister, Himanta Biswa Sarma chuan hmasang thiamna hmanga inenkawl chu he dan hian a khap dawn lo tih a sawi bakah UCC nen inkaihhnawihna a neih loh thu a sawi. Bill hian natna enkawl dam theih tawh loh, pawisa hmuh nana thil mak tithei nia inchhala enkawl a ni ṭhin chu tihtawp a tum ber niin a sawi.

Assam assembly hian nimin vek khan bill dang 14 an pass bawk. Heng zingah hian sorkar hna laknaa dik lo taka ti ṭhin hremna tur pawh a tel. Kar hmasa lam khan Assam cabinet ṭhu khawm chuan Muslim inneih leh inṭhen dan chungchanga kum 87 zeta upa dan chu an lo ṭhiat tawh bawk.