Manipur : Journalist-te'n nawrh an huaihawt

Manipur journalist-te chuan news reporter, Kumar Nongthombam sawisak leh ruk bo a nih avangin nimin aṭang khan ni hnih chhung atan nawrh an huaihawt. Nawrh huaihawt chhung hian Manipur-ah thuthar thehdarhtute chuan chanchinthar an pe chhuak lo a, local network en tur a awm loh bakah chanchinbu tihchhuah a ni lo bawk ang.

All Manipur Working Journalists’ Union (AMWJU) leh Editors’ Guild, Manipur (EGM) chuan nawrh hi an huaihawt a, Nongthombam kutthlaka sawisatute hi man an phut a ni. Kumar Nongthombam hi kum 37 mi niin, February 23, Zirtawpni khan mi tu tih hriat loh, ralthuam kengte chuan a chenna hmun Imphal East-ah sawisain, a chenna in an hal bakah, camera, laptop leh bungraw dang chu an tihchhiatsak bawk a ni. Police chuan thubuai an ziak lut tawh a, pawl emaw mimalin emaw pawikhawihtu an nih thu hi an la sawi lang lo.

AMWJU leh EGM chuan thuchhuah inṭawm siamin hetiang inbeihna hi thuthar thehdarhtute zalenna beihna a nih thu an sawi. Manipur chhunga journalist-te himna chu sorkar chuan ngai pawimawh se an duh thu an tarlang tel bawk.