Manipur Congress MLA hlui pangain BJP zawm

Manipur-a Congress party aṭanga bang, MLA hlui paruk zinga panga chuan Nilaini khan New Delhi-ah Bharatiya Janata Party (BJP) an zawm. 

Congress MLA hlui pangate hi BJP national president JP Nadda chuan a party-ah a lawm lut a, he hunah hian general secretary Ram Madhav, vice president Baijayant Jay Panda leh Manipur chief minister N Biren Singh-te pawh an tel. 

BJP zawmtu MLA hlui zingah hian chief minister hlui leh Congress hruaitu Ibobi Singh-a tupa Henru Ibobi Singh pawh a tel a, midangte chu Paonam Brojen, Oinam Lukhoi Singh, Ngamthang Haokip leh Ginsuanhau Zou-te an ni. 

Hetih lai hian MLA bang zinga pakhat, Md Abdul Nasir chuan BJP a zawm ve lo a, party dang a zawm dawn tih a sawi. Congress party thupuangtu Ningombam Bupenda Meitei chuan Congress chhuahsana BJP zawmte chuan anmahni vote tlingtu mipuite leh Congress ticket-a an din theihna atana thlangtu, party worker-te an phatsan a ni, a ti. Mipuite chuan phatsantute hi an hnawl zel ang, a ti.