Indian Army 40 ten plasma an thawh
Assam sorkarin hri kai dam tawhte hnenah, hri kai enkawlna atana an plasma thawh tura a ngenna chhangin, Indian Army-a sipai 40-te chuan Nilaini khan plasma an thawh.
Tezpur Medical College-a health department leh Indian Army-in Plasma Donation Camp a siamah sipaite hian an plasma an thawh tih official-te chuan an sawi. Health minister Himanta Biswa Sarma chuan sipaite chungah lawmthu sawiin, an state-in an mamawh hun taka mipuite puihna tura an chet chhuah avangin an lawm hle tih a sawi.
Darkar 24 chhungin hripui vangin mi 10 thi
Assam-ah hian Nilaini khan Covid-19 vangin mi 10 an thih belh leh a, hripui vanga thi hi mi 213 an awm tling tawh a ni.
Covid-19 vanga thi zingah hian nausen ni khat leka upa, Tinsukia district-a mi a tel tih official-te chuan an sawi. He nausen nu hi coronavirus a kai avangin nausen hi a pian hlimah test ve nghal a ni a, hri hi a kai tih hriat a ni. August 12 khan Dibrugarh damdawi-inah nausen ni 26-a upa chu hripui a kai tih hriat a nih hnuah a lo thi tawh bawk a, mahse report-ah chuan hri vang ni loin, thawk lama harsatna a neih vang nia sawi a ni thung.
Nilaini khan state chhungah hri kai mi 2,116 hmuh thar leh an ni a, hri kai hmuh tawh hi mi 84,317 an tling tawh. Hri kai zinga 58,294 chu enkawl dam an ni tawh.