Tripura-in home-isolation a awmte A thlawnin oximeter a pe dawn

Tripura sorkar chuan state chhungah hri kai an pun belh zel avangin hri kai zinga an dinhmun ngaihtuahawm lo, damdawiina in enkawl kher loa in lama inkhung hran, home isolation duh zawkte chu sorkarin a thlawnin oximeter a pe zel dawn tih a sawi. 

National Health Mission Director Dr Siddharth Shiv Jaiswal chuan hri kaite enkawlna ṭha zawk pek zel an nih theihna turin state chhunga COVID hospital leh COVID care centre hrang hrangah oxygen con­centrator 185 sem a ni dawn tih a sawi bawk. 

Home isolation-a awm, mi 824 hnenah oximeter hi sem a ni tawh a, hemi rual hian hri kaite hian dam hnuah heng hmanruate hi midangin an hman ve leh theihna tura pe kir turin ngen an ni.  Tripura-ah hian hri kai hmuh chhuah 7,660 an awm tawh a, mi 5,497 enkawl dam ni tawhin mi 65 in an thihpui tawh a ni.