PM-in Sikkim rel station hmasa ber lung a phum

Prime minister Narendra Modi chuan Thawhṭanni khan video conference hmangin Sikkim-a railway station hmasa ber tur, Rangpo Station lungphum a phum.

Amarjeet Agrawal, deputy railway manager of Alipurduar chuan, Rangpo station chuan pawimawhna lian tak pahnih a neih thu a sawi a, khualzinte'n Sikkim awlsam taka an tlawh theih nana hmalakna pawimawh tak a nih bakah, India inhumhimna atan rel station pawimawh tak a ni dawn niin a sawi.

Sikkim chhunga rel kawng siamna hi ṭhuang thumin a kal dawn a, ṭhuang khatna atan Sevoke leh Rangpo inkar chu rel kawng kaltlangtir a ni anga; ṭhuang hnihnaah Rangpo leh Gangtok rel hmanga inkalpawh theia siam a ni leh ang; a tawpnaah Gangtok leh NathuLa inkalpawhna siam a ni leh dawn a ni. Agarwal chuan Sikkim khua leh tuite chuan thlawhtheihna leh motor ringawt ni loin, rel hmanga veivak turin duh an thlang thei tawh dawn a ni, a ti.

Sikkim state-a rel kawng hawn hian inkalpawhna ṭha siamna kawnga hmasawnna a thlen dawn bakah, Sikkim leh China inrinaa buaina chhuak palh thutah pawh awlsam taka bungraw phur luh nan a ṭangkai hle dawn a ni. He hmalakna hi Arunachal Pradesh-a Bhalukpong-Tenga-Tawang railway line zulzuia siam a ni. Ramri hnaiha rel kawngte hi sipai bungrua leh hmanraw hrang hrang rang taka thawn luh a nih theih nan an ṭangkai hle a ni.