Assam : PETA ngenna ngai pawimawhin Lawi insiktir an khap

People for the Ethical Treatment of Animals (PETA) chuan Chikabori, Morigaon district-ah Pathianni khan lawi insiktir tumna a awm tih a hriat hnuin district chhunga thuneitu - District Commissioner leh Superintendent of Police hnenah thlenin thuneitute hmalakna avangin lawi insiktir hi a thleng ta lo a ni.

Gauhati High Court chuan February 6 khan Lawi insiktir khapna atan Standard Operating Procedure (SOP) a tichhuak a, khauh taka kengkawh turin thu a pe zui bawk. High Court chuan January 25 khan Lawi insiktir khapin thu an titlu tawh bawk. PETA chuan High Court thupek hi ṭan chhanah hmangin, DC leh SP hnenah Morigaon-a lawi insiktir tumnaah hian hma la turin an ngen a ni

PETA hian Gauhati High Court-ah writ petition theh lutin, lawi insiktir leh Bulbul sava insualtir chu phal a nih tawh lohna atan khapna thupek pumhlum pe chhuak turin a duh a, PETA chuan hetianga nungchate chunga chetna hian dan tam tak a bawhchhiat bakah chhia-leh-ṭha hriatna hman dik lohna a ni tih chu ṭan chhanah an hmang. PETA chuan zir chianna an neihah nungchate chungah nunrawnna a thleng ṭhin tih an hmuh chhuah thu an sawi a, chung zingah chuan kutthlak, hrai ruih leh insual luihtirte an tel a ni. Heng chin dante hi India dan kalh a nih bakah tharum thawh duh lohna leh India rama chengte'n thil nung dangte duat taka an lo enkawl ṭhin dan nen a inmil lo a ni, an ti.