Tripura : TIPRA party-te chaw ngheiin an nuar dawn

Tripura-a eptu party, TIPRA Motha chuan vawiin aṭang hian tiam chin awm loin chaw ngheia nawrh an tum. Tiprasa hnam thil phut tihlawhtling tura sorkar nawr nan nawrh hi an huaihawt a ni.

TIPRA Motha president Bijoy Kumar Hrangkhawl chuan chaw ngheiin an nuar dawn tih a puang a, BJP kaihhruai sorkar laipui chu Tripura state-a hnam tenau zawkte mamawh ngai pawimawh loah a puh. Bijoy chuan an nawrh chuan eng chen nge a awh dawn tih a sawi lawk theih loh thu tarlangin, a ṭul a nih chuan thih thlenga chaw nghei an inpeih thu a sawi bawk. TIPRA Motha-te thil phut ber chu Tripura chhunga hmasang aṭanga chengte tan state hran “Greater Tipraland” siam a ni. Bijoy chuan an thil phut a hlawhtlin theih nan Tripura leilung fate chu inlungrual taka awm turin a sawm bawk.

Tripura chief minister Manik Saha chuan nawrh huaihawt tum a nih chungchangah hian thu tam a sawi duh lo a,"Nawrh huaihawt tum hi ngaihchan mek a ni, thil pawimawh thleng a awm a nih chuan puan chhuah thuai a ni ang" a ti.