Nagaland-in sample test-na atan Rs vbc 17.16 hmang tawh

Nagaland sorkar chuan Covid-19 leng vangin RT-PCR leh TrueNat khawl hmanga sample test-na atan cheng vaibelchhe 17.16 a hmang tawh. 

Sum hman ral zingah Rs vbc 14 chu RT-PCR testing tihna atan hman niin, TrueNat hmanga test-na atan Rs vcb 3.15 a hmang tawh bawk. Hei hi health and family welfare department-a deputy director Dr Kika Longkumar-a'n Kohima-a press conference a neihah a sawi a ni. 

Dr Kika chuan RT-PCR hmangin sample 31,124 leh TrueNat hmangin sample 21,015 test a nih tawh thu a sawi. RT-PCR hmanga test vawi khat hi Rs 4,500 zela chhutin, TrueNat khawl hmanga test vawi khat hi Rs 1,500 anga chhut a ni. RT-PCR hmanga test neihte hi sorkarin a senso a tum vek tih a sawi bawk. 

Health official-te chuan an state chhunga hri leng chuan a 'peak' a la thleng lo tih an sawi. 

Health and family welfare-a principal director Dr Vizolie Z Suo­khrie chuan an state-a positive pun dante an thlirin mipuite chuan a 'peak' a thleng tawh nia an ngaih mai theih thu a sawi a, mahse an la thleng lo a, hri kai hi an la pun chhoh zel a rinawm thu leh, a 'peak' pawh an thlen thuai erawh a rinawm thu a sawi a ni. 

Nilaini khan hri kai hmuh chhuah thar mi 38 an awm leh a, anni nen hian state chhunga hri kai hmuh tawh hi 3,588 an tling tawh. Hri kai zinga 1,706 chu enkawl dam ni tawh niin enkawl mek 1,838 an awm a, mi pariatin an thihpui tawh bawk.