Shillong-ah community spread a hnai : Health director
Meghalaya health department chuan state chhunga hripui leng mek, Covid-19 chu state khawpui, Shillong-ah mipuia a darh, community spread a hnai tawh hle niin a sawi.
Health Services (MI) director Aman War chuan random testing neihah Shillong leh Garo Hills-a phaizawl huamah mi eng emaw zat an positive tih sawiin, community spread a thleng chho mai dawn tih a sawi. Garo Hills bika plain belt area leh Tirkrikilla-ah community spread hi a inṭan tawh nia an rinhlelh thu a sawi bawk.
State puma hri leng dinhmun chu a la ṭha lo hle ti sawiin, health and family welfare minister Alexander Laloo Hek chuan hri darh tur venna atan sorkar chuan a ṭul a tihna hmun apiangah random testing a kalpui dawn a ni, a ti. Shillong khawpui chhunga commercial area - Lew Mawlong, Motphran leh Police Bazaar-ahte random testing hi neih chhunzawm zel tum a ni.
Meghalaya-ah hian Nilaini kha hri kai hmuh thar mi 78 awmin, Covid-19 kai hmuh tawh hi mi 1,506 an tling tawh. Hemi ni vek hian hri kai enkawl dam pakua awmin enkawl dam tawh hi 694 an awm tawh a, mi parukin hripui hi an thihpui tawh bawk.