Manipur : Ralthuam kengte'n Police officer an ru bo

Manipur state chhunga buaina chuan ziaawm lam a la pan hlei thei lo a, buaina thar lam a chhuah zel avangin boruak a la rit hle.

Thawhlehni zan khan Naipur Addt. SP Moirangthem Amit Singh chu ralthuam keng misual rual, Meitei kalfawr pawl, Arambai Tenggol ni ngeia hriatte chuan Imphal East-a a chenna in aṭangin an ruk bo thu Police-te chuan an sawi. Ralthuam kengte hi hriatchian an la ni lo, in leh a vela bungrua an tihchhiat bakah lirthei awmte chu silai hmangin an kap chhe bawk.

He thil hi Thawhlehni zan dar 7 vela thleng nia sawi a ni. Mi 200 vel ralthuam kengte chu Imphal East-a police officer Amit Singh-a chenna inah kalin buaina an siam a, an ru bo zui ta a ni. Buaina a chhuah hnu rei loteah sipai tirh luh nghal an ni a, Assam Rifles eng emaw zat chuan Imphal East lam an pan nghal a ni.

Manipur police chuan X lamah thuchhuah siamin,"February 27 khan Addt. SP Amit Singh chenna in chu ralthuam keng, tu tih hriat loh mi 200 velin kal chilhin inkahna a thleng a, misual rualte hian Addt. SP in leh a chhehvela bungruate chu an tichhia a ni," an ti. Inkahna thlengah hian mi pahnih, Rabinash Moirangthem leh Kangujam Bhimsen chuan hliam an tuar avangin JNIMS damdawi inah dah luh an ni tih an tarlang tel bawk. Inbeihna thlengah hian Addt. SP leh amah vengtu pakhat chu ruk bo an nih thu an sawi a, sipaite'n Kwakeithel Konjeng Leikai area-ah buaina chhuah hnu deuhah an chhan chhuak leh a ni tih Manipur police chuan an tarlang. Hemi kaihhnawihah hian thubuai ziah luh a nih thu an sawi.

Manipur tribal pawlin AFSPA hnuaia awm leh duh

Manipur tribal pawl pakhat, Committee on Tribal Unity (CoTU) chuan Imphal phairuam huam chhungah Armed Forces Special Powers Act (AFSPA) puang leh turin sorkar laipui an ngen.

CoTU chuan union home minister Amit Shah hnenah memorandum an theh lut a, he memorandum-ah hian Manipur sorkarin a hnuaia thawk police-te a siksawi dan en ṭha leh turin sorkar laipui chu an ngen a ni. Hemi bakah hian CoTU chuan Imphal phairuama police station 19 huam chhungah AFSPA dan chu hman leh an duh thu an thlen bawk. CoTU memorandum hi Kangpokpi district Deputy Commissioner kaltlangin Home Minister hnenah an theh luh a ni.

February 14-a police officer leh police mi leh sa sawn zingah Kuki-Zo hnam mi 108 lai an awm tih CoTU chuan an sawi a, heng mite tan hian Imphal phairuama hnathawh chu a him loh bakah an nunna atan a pawi thei dawn a ni, an ti. Manipur sorkarin a hnuaia thawk a sawn zingah hian sorkar officer lian tak tak pawh an tel a ni.

Manipur sorkarin buaina chhuah chhan ber chinfel aia ralthuam ruk bo hmuh let leh a ngai pawimawh zawk chu an dem tak zet tih CoTU chuan an tarlang. Sorkarin hetiang a ngai pawimawh a nih chuan AFSPA hnuaia Imphal dah leh chu ralthuam bo lak let a nih theih nana kawng ṭha leh awlsam ber a ni, an ti.