Nagaland-ah CM Universal Life Insurance scheme tlangzarh

Nagaland chief minister Neiphiu Rio chuan Thawhlehnia budget sawi hawnna a neih ṭumin an state chuan CM Universal Life Insurance scheme an neih tur thu a sawi. He scheme hnuaiah hian chhungkuaa eizawngtu ber chu insurance tihsak an ni dawn a, an lo boral palh a nih pawhin Rs. nuai 2 thleng a chhungte'n an dawng thei dawn a ni.

Nagaland insurance scheme thar hian state chhunga chhungkua zawng zawng tan financial security neihtir chu a tum ber a ni. Chief Minister chuan chetsualna tawk palh tan pawh scheme hnuaiah hian insurance a awm dawn tih a puang a, hei hian chhungkaw tinah a eizawngtu ber leh mi dang pathum a huam tel dawn a ni. Tawhsual tawh avanga ramtuileiloa awm leh nunna chan thlengin a huam tel ang a, an nat dan a zirin pawisa hi pek an ni dawn a,insurance-a pawisa lak theih sang ber chu Rs. nuai 2 a ni ang.

He scheme hnuaiah hian chetsualna hrang hrang a zirin pawisa lak theih zat bithliah fel a ni a, Nagaland-a chhungkua zawng zawng tana hman theih tura duan a ni. He scheme-a hman tur atan hian sorkar chuan Rs. vbc. 15 a dah hrang nghal a ni.

CM Neiphiu Rio hian kum 2022 aṭanga sorkar scheme ngaih pawimawh, Chief Minister’s Health Insurance Scheme leh PM-JAY ṭangkawp chuan mipui damlo enkawl ngaite chu an senso a chhawk zangkhai hle tih sawiin, scheme pahnihah hian chhungkaw 35,833 inenkawlna atan Rs. vbc. 82.29 chuang hman ral a ni tawh tih a sawi bawk.