Meghalaya sikul-ah 'bag-less' day nei dawn

Meghalaya education minister, Rakkam A Sangma chuan an state chhunga zirna inah ipte-ah-loh-ni (bag-less day) neih a ni ṭhin dawn tih a puang. He hmalakna hi National Education Policy (NEP) 2020-in a phut anga ruahmanna hi siam a ni.

Education Minister chuan,"Sikulte'n zirlai naupangte tana ipte ah loh ni tur hi an duh ni tak an thlang thei ang" a ti a, sorkar chuan ipte-ah-loh-ni atan theme chi hrang hrang 10 nei turin ruahman an siam thu a sawi bawk. Minister chuan ipte-ah-lo-ni atana inkaihhruaina chu tihchhuah thuai a ni dawn, a ti.

Minister R A Sangma hian NEP 2020 duh dana zirlai naupangte'n an zirlaia hmasawnna an neih chin hriat theih nan hunbi mumal tak neia enfiah ṭhin tur NEP-in a tih chu an state education department chuan a taka an kalpui tur thu a sawi. He hmalakna hian zirlaite leh zirtirtu tan hlawkna tam tak a thlen theih dawn avangin education department chuan an ngai pawimawh hle dawn a ni, a ti.Hetianga mumal taka zirlaite'n an zirlaia hmansawnna an neih enfiah thei tur hian state chhunga zirna inte chu ṭan la turin a chah nghal bawk.